Жезқазған–Қарағанды жолы: өңір дамуына серпін беретін жоба
Қазақстан үшін стратегиялық маңызы зор Жезқазған–Қарағанды автожолының құрылысына қатысты ірі қаржыландыру келісіміне қол қойылды. Бұл жоба өңірлер арасындағы көлік қатынасын жақсартып қана қоймай, елдің транзиттік әлеуетін арттыруға бағытталған маңызды бастамалардың бірі.
ҚР Премьер-Министрінің орынбасары Серік Жұманғариннің жетекшілігімен АҚШ-тың Вашингтон қаласындағы Дүниежүзілік банк штаб-пәтерінде өткен кездесуде Жезқазған–Қарағанды бағыты бойынша ұзындығы 570 шақырымды құрайтын автожол құрылысына арналған 650 млрд теңгелік келісім рәсімделді.
Келісім «ҚазАвтоЖол» ұлттық компаниясы» АҚ, Халықаралық қайта құру және даму банкі және Азия инфрақұрылымдық инвестициялар банкі арасында жасалды. Халықаралық қаржы институттарының қатысуы жобаның ауқымы мен маңызын айқындай түседі.
Жоба толық жүзеге асқан жағдайда Ұлытау өңірінің көлік инфрақұрылымы жаңа деңгейге көтеріледі. Сарапшылардың пікірінше, бұл бағыттың жаңаруы өңірдің экономикалық белсенділігін арттырып, жүк және жолаушылар тасымалын жеңілдетеді.
Сонымен қатар, биыл Қызылорда бағытына апаратын автожол құрылысының аяқталуы күтілуде. Ал Қарағанды бағыты толық жаңғыртылып, сапасы артқаннан кейін, Ұлытау өңірі Астана мен Оңтүстік аймақтарды жалғайтын маңызды көлік дәлізінің өзегіне айналмақ.
Осылайша, жаңа жол жобасы тек көлік қатынасын жақсартып қана қоймай, өңірдің әлеуметтік-экономикалық дамуына да тың серпін бермек.