Жезқазғанда Ғарышты бағындырушылар монументі маңындағы жазулар өшірілді

Жезқазғанда қоғамдық орындарды таза ұстау және тарихи-мәдени нысандарды бүлдірудің алдын алу мақсатында тазалық жұмыстары жүргізілді. «Әділет» партиясы жанындағы «Жастар Рухы» жастар қанатының Ұлытау облыстық филиалы ерікті жастармен бірлесіп, «Вандализмге жол жоқ!» республикалық акциясына қатысты.

Бастама аясында жастар Жезқазған қаласындағы Ғарышты бағындырушылар монументінің аумағын ретке келтіріп, қоғамдық нысанға жазылған түрлі жазуларды өшірді. Бұл — қала келбетін көркейтуге ғана емес, ортақ мүлікке жауапкершілікпен қарау мәдениетін қалыптастыруға бағытталған жұмыс.

Қоғамдық орындардағы ескерткіштер мен монументтер — қаланың тарихи-мәдени келбетін айқындайтын маңызды нысандар. Оларды бүлдіру, қабырғаларына жазу жазу немесе аумағын ластау қоршаған ортаға ғана емес, қоғамның ортақ құндылықтарына да немқұрайды қарауды білдіреді.

«Вандализмге жол жоқ!» акциясы республикалық деңгейде ұйымдастырылып, еліміздің өңірлерінде өткізілуі жоспарланған. Оның аясында жастарды қоғамдық кеңістіктерді қорғауға, қоршаған ортаның тазалығын сақтауға және ортақ мүлікке ұқыпты қарауға үндейтін іс-шаралар қолға алынбақ.

Мұндай бастамалардың түпкі мақсаты — тазалықты бір күндік науқанмен шектемей, оны күнделікті әдетке айналдыру. Өйткені туған жердің көркі мен қоғамдық орындардың жай-күйі әр тұрғынның жауапкершілігіне байланысты. Ал тарихи нысандарды сақтау — келер ұрпаққа ортақ мұраны аман жеткізудің бір жолы.