Жалпыға бірдей декларациялау жалғасуда
Елімізде жалпыға бірдей декларациялау науқаны жалғасып жатыр. 2026 жылы азаматтардың жекелеген санаттары 270.00 нысаны бойынша табысы мен мүлкі туралы декларация тапсыруға міндетті.
Ұлытау облысы бойынша Мемлекеттік кірістер департаментінің хабарлауынша, декларацияны компания басшылары мен құрылтайшылары, сондай-ақ шетелдік банктерде есепшоты бар немесе шетелде жылжымайтын мүлкі мен шетелдік компанияларда үлесі бар қазақстандықтар тапсыруы тиіс. Сондай-ақ бағалы қағаздар, цифрлық активтер және инвестициялық алтын да декларациялануға жатады.
Сонымен бірге, бір жыл ішінде қымбат мүлік сатып алған азаматтар — мысалы, белгіленген шектен асатын құны бар жылжымайтын мүлік немесе көлік құралдары — декларация тапсыруға міндетті.
Мамандардың айтуынша, декларацияны 2026 жылдың 15 қыркүйегіне дейін ұсыну қажет. Оны салық төлеушінің жеке кабинеті, e-Salyq Azamat мобильді қосымшасы немесе екінші деңгейлі банктердің сервистері арқылы онлайн түрде жіберуге болады.