Қазақстанда паспорттың жаңа дизайны әзірленіп жатыр: ескі құжаттарды ауыстыру міндетті болмайды
Қазақстанда азаматтық паспорттың жаңа дизайны әзірленіп жатыр. Бұл туралы Ішкі істер министрлігі мәлімдеді. Ведомствоның хабарлауынша, жаңа үлгі әзірге жобалау кезеңінде болғандықтан, оның нақты қашан қолданысқа енгізілетіні әзірге белгісіз.
Министрлік өкілдерінің айтуынша, жаңа дизайн қолданысқа енгізілгеннен кейін азаматтардың бұрын берілген паспорттарын міндетті түрде ауыстыруы талап етілмейді. Қолданыстағы төлқұжаттар жарамдылық мерзімі аяқталғанға дейін заңды күшінде қала береді.
Жаңа үлгідегі паспорт алғаш рет құжат рәсімдейтін азаматтарға немесе қолданыстағы төлқұжатының мерзімі аяқталған кезде беріледі. Сондықтан жаңа дизайнның енгізілуі халық үшін қосымша міндет немесе жаппай құжат ауыстыру науқанын білдірмейді.
ІІМ мәліметінше, жаңа паспорттың сыртқы келбеті мен қорғаныс элементтері әлі де пысықталу үстінде. Соңғы нұсқа бекітілгеннен кейін ғана көпшілікке таныстырылады.
Бұған дейін мемлекеттік кеңесші Ерлан Қарин жаңа паспорт дизайнында ұлттық болмыс, мәдени мұра мен еліміздің көрікті жерлері көрініс табатынын айтқан болатын. Сондай-ақ құжатқа халықаралық талаптарға сай заманауи қорғаныс элементтері енгізіледі деп жоспарланып отыр.
Айта кетейік, жаңа дизайн енгізілген жағдайда да қазіргі қолданыстағы паспорттар өз мерзімі аяқталғанға дейін жарамды болып қала береді.