Ұлытауды жақсы көрудің жеті себебі
Ұлытау — Қазақстанның дәл жүрегінде орналасқан, тарихы терең, табиғаты тылсым әрі рухани құндылығы аса жоғары қасиетті өңір. Ұлытау облысы еліміздің әкімшілік картасында жас облыс болғанымен, оның тамыры ғасырлар тереңіне бойлайды. Бұл өлкені жақсы көруге себеп көп. Солардың ең негізгілерін төменде ұсынамыз.
1.Қазақстанның жүрегі — географиялық орталық
Ұлытау таулары елдің дәл орталығында орналасқан. Осы қасиетті мекеннен Сарысу, Қаракеңгір, Сарыкеңгір өзендері бастау алып, өңірдің табиғи маңызын айқындай түседі. Бұл -Қазақстанның географиялық әрі рухани орталығы саналатын ерекше аймақ.
2.Қазақ тарихының алтын бесігі және киелі мекен
Ұлытау — қазақ хандығының қалыптасуымен тікелей байланысты тарихи өңір. Ел бірлігі бекіп, мемлекеттіліктің негізі қаланған қасиетті жер. Ежелден-ақ киелі саналып, сан түрлі аңыздар мен тарихи оқиғаларға арқау болған бұл мекен халық жадында ерекше құрметке ие.
3.Табиғаты көз тартар көркем өлке
Кең жазира дала, қыратты таулар мен ерекше табиғи ландшафт Ұлытаудың айрықша келбетін қалыптастырады. Әр маусымда бұл өңір өзінше құбылып, көз тоймас сұлулық сыйлайды.
4.Бай тарихи-мәдени мұра
Ұлытау аумағында көптеген тарихи ескерткіштер, көне қорымдар мен археологиялық орындар сақталған. Бұл — қазақ халқының өткені мен рухани тарихын айғақтайтын тірі шежіре.
5.Тыныштық пен сабырлы өмір салты
Ұлытау — халқы аз, тынысы кең өңір. Мұнда мегаполистердегідей қарбалас тіршілік жоқ. Өмір баяу, сабырлы ағады, адамдар асықпайды. Күнделікті қашықтықтар да жақын, қарапайым тіршілік адамға ерекше тыныштық пен жайлылық сыйлайды.
6.Қонақжай, кеңпейіл халық
Өңір халқының басты ерекшеліктерінің бірі — қонақжайлық пен мейірімділік. Келген қонақ әрдайым құрметпен қарсы алынып, төрден орын беріледі. Бұл — ұрпақтан-ұрпаққа жалғасқан ұлттық қасиет.
7.Рух беретін қасиетті мекен
Ұлытауға келген жан ерекше тыныштық пен рухани күш сезінеді. Табиғат пен тарихтың үйлесімі бұл жерге ерекше энергетика сыйлайды. Сондықтан да Ұлытау — жанды тыныштандырып, ойды сергітетін киелі мекен.
Қорытынды: Ұлытау — тек өлке емес, ол — тарих, рух және табиғаттың тоғысқан қасиетті кеңістігі. Бұл өңірді жақсы көру — өз тамырыңды, тарихыңды және рухани болмысыңды құрметтеу деген сөз.
Айдана Базарбайқызы, Жансая Махамбет