Елімізде жұмыс табу мүмкіндігі артып келеді
Қазақстанның еңбек нарығында оң өзгерістер байқалады. Елде жұмыс күшінің саны өсіп, тұрақты жұмысқа орналасып жатқан азаматтар көбейіп келеді.
ҚР Еңбек және халықты әлеуметтік қорғау министрлігінің мәліметінше, қазіргі таңда елдегі жұмыс күшінің саны 9 млн 838,1 мың адамға жетті. Бұл өткен жылмен салыстырғанда 103 мыңнан астам адамға көп. Ал жұмыспен қамтылғандар саны 9 млн 392 мың адамға жетті. Ең бастысы – тұрақты жұмыс істейтіндер саны артып келеді. Бір жыл ішінде жалдамалы жұмыскерлер қатары шамамен 150 мың адамға көбейіп, 7 млн 290,4 мың адамға жеткен.
Мемлекеттік қолдау шаралары да өз нәтижесін көрсетіп отыр. 1 тамыздағы мәлімет бойынша 388 512 адам жұмысқа орналастырылды. Оның ішінде 298 904 адам тұрақты жұмыс тапқан. Жұмыс іздеген азаматтарға Электрондық еңбек биржасы, кәсіби оқыту бағдарламалары және субсидияланатын жұмыс орындары көмектесіп келеді. Электрондық еңбек биржасы арқылы бос жұмыс орындарын қарап, өзіне қолайлы қызметке өтінім беруге болады.
Ал жаңа мамандық меңгергісі келетіндер үшін кәсіби оқыту бағдарламалары қарастырылған. Бұл еңбек нарығында сұранысқа ие мамандықтарға қайта оқып, жұмысқа орналасуға мүмкіндік береді. Министрлік алдағы уақытта да тұрақты жұмыс орындарын көбейтуге, азаматтардың біліктілігін арттыруға және еңбек нарығындағы мүмкіндіктерді кеңейтуге бағытталған жұмыстар жалғасатынын атап өтті.
Қысқасы, Қазақстанда жұмыс істегісі келетін азаматтарға мүмкіндік көбейіп келеді. Ал тұрақты жұмыс — тұрақты табыс пен әлеуметтік кепілдіктің негізі.